O novo presidente da Real Academia Galega (RAG), Henrique Monteagudo (Muros, 1959), –elixido con 23 votos favorables e dous en branco– comprometeu “continuidade e un novo impulso” á fronte da institución académica. Tamén demandou un “pacto social” polo galego e considerou necesarias novas medidas neste sentido.
En particular, para chegar aos mozos avogou por facelo a través doutros medios de comunicación, citando neste sentido as redes sociais.
“A nosa gran preocupación é a situación do idioma, a Academia é unha institución con poucos recursos materiais pero temos ideas e coñecemento e desde ese capital estamos a reclamar medidas en defensa do galego e propoñendo novas maneiras de abordar o problema”, sinalou Monteagudo.
“En contacto coa sociedade”
“Pedindo un pacto social pola lingua e ao dispor de calquera medida que se dea nesta liña, o galego é de todos e todas, é necesario un novo rumbo”, engadiu para incidir en que fan “falta novas ideas e novos impulsos para o idioma”. Para iso, apelou a unha RAG “moi en contacto coa sociedade”.
O académico tamén insistiu na necesidade de “máis financiamento” ante a situación “precaria” da institución neste sentido. “Medios para facer cousas”, remarcou para manifestar que “é o momento de lanzar unha fundación proacademia para novos proxectos”.
Así o expuxo ante os medios de comunicación despois de que a institución celebrase onte o pleno extraordinario de elección da nova presidencia, na que a súa foi a única candidatura.
O XIV presidente da Real Academia Galega estará acompañado na comisión executiva por Ana Boullón Agrelo como secretaria; María López-Sández na tesourería; María Dolores Sánchez Palomino como arquiveira bibliotecaria e Lourenzo Fernández Prieto como vicesecretario.
