Predecían en 2007 que estaría lista para 2008, xusto cando se cumprisen 150 anos do matrimonio Murguía. Distintos trámites administrativos fixeron que a casa de Rosalía, cedida por Caixa Galicia hai doce anos á Real Academia Galega, alargara a súa espera e un expresidente coma Xosé Ramón Barreiro sinalaba en 2008 que non sería ata 2010 cando o número 3 da rúa Príncipe, en pleno casco vello, volvese a abrir as súas portas á cultura.

O que non contaban daquela era que o gordo da crise estaba aínda por chegar. Dous anos máis tarde, o proxecto continúa sen pasar da condición de “proxecto” a pesar de que o organismo galego leva metidos no inmoble 50.000 euros en calidade de planos e estudios arqueolóxicos. A situación fai que a sede da rúa Tabernas non contará con este apéndice ata que a situación recobre a normalidade.

A RAG leva investido 50.000 euros nun proxecto adxudicado a Andrés Albalat

O secretario da RAG, Xosé Luís Axeitos, explicaba onte que a obra xa está adxudicada ao estudo de Andrés Albalat e que a maior parte do investimento corresponde á solicitude dos permisos necesarios. Lembra o académico que se ben no momento da cesión, o bipartito da Xunta –con Ánxela Bugallo como titular de Cultura– comprometíase a inxectar unha axuda anual para a restauración da antiga vivenda dos Murguía, o momento actual fai imposible esta forma de financiamento que posibitaría á Real Academia Galega poder tramitar un crédito co banco. Ningunha das dúas partes, Xunta nin banco, poden afrontar unha operación así na actualidade e a realidade da institución pasa por axustarse a un orzamento anual e seguir traballando pola lingua na sombra e a través de congresos e publicacións, que penden dun fío e do compromiso do Goberno autonómico.

Non hai data polo tanto para que a casa de Rosalía sexa unha parada museolóxica máis na cidade. Axeitos recorda que a cesión foi asinada por 25 anos pero asegura que “malo será que nese tempo non a teñamos arranxada”. Cinco anos xa se foron entre papeleo e a paralización total do proxecto pola falta de cartos pero “non vamos a estar metidos na crise toda a vida”, di o secretario.

O futuro do bloque dos Murguía estará en branco ata que recuperen o nivel de colaboración anterior. Neste aspecto, Axeitos falaba da actitude da Xunta como exquisita. Máis alá de ideoloxías, o Goberno autonómico sempre tivo un trato deferente co organismo, de máxima colaboración e coordialidade: “Se non hai cartos, non hai cartos para ninguén” e “nós teremos que cumprir o que nos corresponde coa crise”. O catedrático de Lingua sinalaba que son moitas as seccións que teñen que funcionar tales como a gramática, a lexicografía ou a onomástica, que permiten alimentar o diccionario de termos e revisar constantemente a toponimia do país.