A orde pola que se ditan instrucións para a elaboración dos orzamentos da comunidade autónoma de Galicia para o ano 2026 advirte que as dúas prórrogas consecutivas das contas xerais do Estado (PGE) e o atraso na actualización das entregas a conta dificultan a planificación financeira e comprometen a previsibilidade das administracións territoriais.
Deste xeito, o Diario Oficial de Galicia (DOG) recolleu de forma explícita as críticas que o conselleiro de Facenda, Miguel Corgos, xa adiantou este pasado luns na rolda de prensa posterior á reunión do Consello da Xunta.
Primeiro trámite
E é que as instrucións, que constitúen o primeiro trámite co que se dá por iniciado o proceso de elaboración das contas para o ano que vén, adoitan incluír referencias á conxuntura económica internacional e nacional e a decisións políticas que afectan á economía.
Así, a orde que publicou onte o DOG refírese aos “riscos” que entraña o panorama internacional e avisa de que a isto “súmase a inestabilidade política no ámbito estatal, que introduce elementos adicionais de incerteza respecto da aprobación dos orzamentos e da capacidade de impulsar reformas estruturais necesarias para garantir a consolidación fiscal e a estabilidade institucional”.
“Esta situación vese reflectida nas dúas prórrogas consecutivas dos orzamentos xerais do Estado e o atraso na actualización das entregas a conta para as comunidades autónomas, o que dificulta a planificación financeira e compromete a previsibilidade orzamentaria das administracións territoriais”, resalta.
