Bico de Xeado converte o Branco Lexítimo de Paderne nun novo sabor de edición limitada

O sábado, 5 de xullo, e o domingo, día 6, o Branco Lexítimo poderá beberse, pero tamén catarse en formato xeado. Bico de Xeado preparou este novo sabor de edición limitada que estará dispoñible, unicamente, na II Feira GastroLexítimo de Paderne. Esta variedade estará á venda ao longo da fin de semana para todas aquelas persoas que desexen descubrir os atributos e características deste viño do xeito máis refrescante.

A compañía terá un stand propio na segunda edición da cita gastronómica. Neste posto, exporá e ofrecerá a súa gama de sabores clásicos, dando a posibilidade, ademais, de degustar a súa nova variedade de Branco Lexítimo.

O alcalde, Sergio Platas, anima á xente a sumarse á feira "para gozar do noso Branco Lexítimo, xa sexa do xeito tradicional ou en forma de xeado" e agradece á compañía "o esforzo por converter este caldo nun novo sabor". O rexedor incide en que este tipo de accións contribúen "a poñer en valor e dar a coñecer este viño, que ten a súa propia denominación de orixe".

Un programa completo

A II Feira GastroLexítimo contará cun completo programa que se desenvolverá ao longo de dúas xornadas (sábado, 5 de xullo, e domingo, día 6). Entre as actividades do sábado haberá unha cata a cegas a cargo do experto Alejandro Paadín, obradoiros gastronómicos, animación, exhibicións deportivas e boa música. Neste apartado, destaca a actuación de Luar na Lubre, prevista para o sábado, ás 21.30 horas.

O domingo, día 6, terá lugar o II Trail e Andaina GastroLexítimo de Paderne, no que tomarán parte 350 persoas en distintas modalidades. Así mesmo, ás 11.00 horas está prevista unha experiencia gastronómica a cargo de Miguel Mosteiro. O programa incluirá tamén unha cata a cegas por parellas por parte de Alejandro Paadín (13.00 horas), talleres e xogos para os nenos e nenas, entre outras opcións.