A directora xeral da Axencia Tributaria de Galicia (Atriga), Sonia Lafont Sendino, compareceu onte no Parlamento de Galicia para informar sobre a actividade desenvolvida pola institución durante o ano 2024.Na intervención, Lafont destacou que no exercicio do 2024 a recadación dos impostos tramitados pola Atriga aumentou nun 8,9% con respecto ao ano anterior. Nese sentido, a directora subliñou que o 95,3% dos contribuíntes galegos cumpren coas súas obrigas fiscais.
Como contraparte, do total das percepcións arredor de 100 millóns de euros corresponden coa débeda detectada na loita contra a fraude fiscal. Sonia Lafont puxo de manifesto o compromiso da Atriga co exercicio de control tributario e remarcou o labor dos traballadores que, de media, detectaron unha débeda de 286.000 euros cada un.
Lafont incidíu sobre as melloras na atención aos cidadáns por parte da Atriga. Así, indicou que o sistema se caracteriza por ser “multicanle”, xa que o cidadán pode elixir se ser atendido presencial, telefónica ou tecnoloxicamente, “segmentado”, de xeito que os maiores de 65 anos reciben unha atención preferente, e eficiente porque a posesión dunha cita garante a atención “nun día e nunha hora concretos”.
Máis de 1,77 millóns de usuarios foron atendidos por Atriga o pasado ano, dos que 12.000 recibiron atención a través da canle para maiores de 65 anos. Con respecto a anos anteriores a Atriga reduciu nun 38% o tempo medio de espera dos contribuíntes, á vez que aumentou en tres minutos o tempo de atención, pasando dos 8,2 minutos en 2020 aos once no 2024.
Na liña das melloras que Atriga efectuou, Lafont deu a coñecer a renovación da web ou o lanzamento da aplicación móbil. Lafont quixo incidir no aumento dos medios de pago que ofrece a Atriga para facilitar as xestións.
Inspección e control
Na rolda de preguntas, a portavoz do PSdeG, Patricia Iglesias Rey, solicitou o reforzo do labor de inspección e control da Atriga e instou a reforzar as campañas de sensibilización en favor do pago de impostos entre a xente nova.
Pola súa banda, Noa Presas Bergantiños, do BNG, preguntou polo número de traballadores na Atriga, ao que Lafont respostou que seguían “camiñando para ir incrementando o persoal”.
