Tras a charla de Antón Reixa no ciclo ‘Maruja Mallo. De Galicia ás vangardas do século XX’, esta tarde é a quenda da xornalista Carme Vidal. Ás 19.00 horas, no Museo de Belas Artes, impartirá a conferencia ‘Maruja Mallo: a súa conexión permanente con Galicia’.
“A miña idea é facer fincapé en toda a súa traxectoria vital, biográfica, e destacar o vínculo que sempre tivo con Galicia, dende que nace en Viveiro”, comenta Vidal, que tamén afondará “nesa figura dunha artista extraordinaria que ten que exiliarse e sobre ela pesou un gran silenciamento polo exilio e pola súa condición de muller”.
“Ela era un dos grandes nomes brillantes do Madrid cultural dos anos trinta e logo desaparece incluso das memorias dos seus compañeiros”, engade Vidal, que tamén tratará, explica, “esa vontade que tivo de reinventarse, de darse a coñecer, de que a xente saiba quen é Maruja Mallo”.
Pero o fío de toda a súa palestra será ese vencello con Galicia, “que foi moito máis do que se recoñecía”, asegura en alusión ao que sempre se di de que Mallo naceu en Viveiro dunha maneira “case circunstancial” polo feito do destino do seu pai, funcionario de aduanas. “Pero non é así, hai unha liña de continuidade grande que vincula a Maruja Mallo con Galicia, aínda que marchase con 11 anos”, explica Vidal, en referencia ás obras creativas con referencias aos traballos do mar e as súas relacións co exilio galego ou os textos que mandou desde Buenos Aires, como a serie de artigos ‘Relato veraz do que aconteceu en Galicia’, “un texto de denuncia da represión, no que falaba de Alexandre Bóveda ou Carballeira”.
Un cuarto de século
O traballo de Vidal arredor de Maruja Mallo “é de hai 25 anos”, cando traballando en ‘A Nosa Terra’, na redacción descubriron o que denominaron como “Mulleres sorpresa”. Referíanse a María Casares, María Luz Morales, as irmás Alvajar ou a propia Mallo. “Decidimos sacar unha colección editorial para descubrilas, construir a súa biografía e dalas a coñecer”.
Así empezou a buscar “a explicación daquela vella tan coloreada que participaba na movida madrileña”, unha muller “valente, libre e irreverente”.
