A serie ‘Rapa’ e as películas ‘O Corno’ e ‘Matria’ lideran as candidaturas finalistas da XXII edición dos premios Mestre Mateo, que foron desveladas este mércores no museo Mundo Estrella Galicia (MEGA) polos actores Lucía Veiga e Denís Gómez. As longametraxes ‘Salta’ e ‘Fatum’ son as seguintes pezas máis nomeadas.
Estas catro últimas cintas figuran nas nominacións a Mellor Película e Mellor Dirección –Jaione Camborda por ‘O Corno’, Álvaro Gago por ‘Matria’, Juan Galiñanes por ‘Fatum’ e Olga Osorio por ‘Salta’–. En Mellor Serie de TV, ‘Rapa’ é a favorita xunto a ‘Motel Valkirias’, ‘Os argonautas e a moeda de ouro’ e ‘Saudade de ti’.
Janet Novás (‘O Corno’), Lidia Veiga (‘Canto toco un animal’), María Vázquez (‘Matria’) e Mónica López (‘Rapa’) son as finalistas en Mellor Interpretación Feminina Protagonista , mentres que na categoría masculina están Darío Loureiro (‘Rapa’), Javier Cámara (‘Rapa’), Luis Tosar (‘Fatum’) e Tamar Novas (‘Salta’).
En Mellor Guión compiten Álvaro Gago (‘Matria’), Fran Araújo e Pepe Coira (‘Rapa’), Jaione Camborda (‘O Corno’) e Olga Osorio e Araceli Gonda (‘Salta’). Como actrices de reparto están nominadas Carla Rivas (‘O Corno’), Iolanda Muíños (‘Rapa’), Melania Cruz (‘Rapa’) e Susana Sampedro (‘Matria’); e na categoría masculina Diego Anido (‘O Corno’), Eduardo Alberto Rodríguez Cunha ‘Tatán’ (‘Matria’), Federico Pérez (‘Rapa’) e Santi Prego (‘Matria’).
‘A viaxe de Lucy’, ‘Chichi e máis eu’, ‘Emoción, Vida y Teatro-A Nave das Marías’ e ‘Espazos en Branco’ figuran en Mellor Documental e ‘Antes de que se poña o sol’, ‘Nena’, ‘O Coidado’, ‘O neno sardiña’ e ‘Ulises’, en Mellor Curtametraxe. Como Mellor Programa, os seleccionados son ‘Cinephilia’, ‘Clac’, ‘Cos pés na terra’ e ‘O gran camiño: Grandes rutas a pé do mundo’; mentres que entre os mellores comunicadores están Juan Fuentes (‘Quen anda aí?), Lucía Veiga (‘Malicia Noticias’), Paco Lodeiro (‘Atrápame se podes’) e Simone Saibene (‘Cinephilia’).
Nomes coruñeses como os das produtoras Vaca Films, Portocabo e Undodez, o actor Miguel Canalejo ou a directora de fotografía Lucía Catoira –natural de Cambre– figuran na lista dos aspirantes aos galardóns.
Os premiados daranse a coñecer na gala de que se celebrará o sábado 23 de marzo no Coliseum.
