Cuarteto Federal é un proxecto que naceu na estadía de Xacobe Martínez nas Residencias Artísticas Mariñán 2022, organizadas polo departamento provincial de Cultura da Coruña. A súa proposta é o encontro de músicos convocados desde a periferia tanto xeográfica como estilística: o piano do andaluz Javier Galiana, a batería do catalán Guillem Arnedo, o saxo do Canario Kike Perdomo e o contrabaixo do santiagués Xacobe Martínez. Esta reunión artística conecta, nun dos formatos tótem do jazz contemporáneo, catro músicos nados nas décadas dos 60, 70 e 80, que apostan por explorar os lugares comúns, as diversidades territoriais e as posibilidades que esta experiencia pode xerar.

As entradas pódense retirar na web do teatro Colón.