DESPROPÓSITOS

Abofé que non me meto nada (nin alcohol, nin petas, nin fariña, nin  similares); só consumo unhas pastillas diuréticas, que creo que só me axudan a eliminar líquidos sobrantes. Mais o outro día, sen estupefaciente ningún polo medio, creo que tiven a maior alucinación da miña vida. Foi lendo as declaracións do ministro Fernández Díaz sobre Guardiola: un ser entregado ó deus diñeiro, un vulgar peseteiro, que, por iso e por nada máis, xogou na selección española. 
Sería que gañaba pouco no Barça? Non haberá ningún multipluriempregado infiltrado no impoluto Partido Popular? Pois todo porque a don Pep se lle ocorreu poñer o seu nome na candidatura soberanista catalana. 
Se xa Mariano Rajoy dixo o que tiña que dicir sobre o asunto catalán, non estaría mellor este señor ministro de Interior coutando expresións como “putas baratas” –claro convite á violencia sexista– de alcaldes compañeiros de partido?  Hoxe é 25 de xullo, día grande da nosa nación, e haberá que celebralo debidamente. Comezar esta mesma tarde, facendo acto de presenza na praza do Himno, non é mala cousa.