Un 21% máis de inspeccións detectan 24 millóns defraudados en Galicia

 A delegada Especial da Axencia Estatal de Administración Tributaria (AEAT) de Galicia, Imelda Capote Martín, comentou hoxe que un vinte e un por cento máis de inspeccións serviron para detectar 23,9 millóns de euros defraudados na comunidade autónoma.

A loita contra a fraude fiscal é un obxectivo prioritario da AEAT e serao máis se se acepta a proposta da comisión de expertos sobre fiscalidade, que detalla que o diñeiro que evade impostos é moi elevado.

Imelda Capote cualificou hoxe, ante os medios de comunicación, de "bos" os resultados do curso pasado en España, con 10.950 millóns de euros detectados, 1.500 millóns menos que en 2012, aínda que isto se debe á gran cantidade de "recursos ou reclamacións resoltos en tribunais", tendo en conta que "se se quita ese efecto medrou un 1,9 por cento".

No caso concreto de Galicia, onde non hai unha delegación de grandes contribuíntes, os números son moito mellores, pois a recadación medrou desde 337,4 millóns de euros a 361,3.

En total, o crecemento é dun 7,1 por cento que se debe a que o número de inspeccións aumentou nun vinte e un por cento, desde 4.900 ata case 6.000 nun único ano.

Outro asunto de interese que comentou foi o do cambio de presentación dalgunhas declaracións, como a trimestral do IVE, de maneira telemática, que recoñece que xerou "queixas", aínda que non están cuantificadas.

Con respecto á negociación co equipo de Primeira División da Coruña, o Deportivo, dixo que se chegou a un entendemento, aínda que preferiu non desvelar os datos.

"Eu non podo falar de expedientes concretos. Non podo falar de convenios nin de condicións. Chegouse a un acordo singular co Deportivo, co anterior equipo directivo está claro que non se chegou a un acordo, se non, non se chegaría a un acordo singular", concluíu. EFE

1011038