Se a quiniela de Fernando Vázquez ten éxito, o Deportivo regresará o luns de Málaga coa permanencia selada. Para conseguilo, ten que gañar en La Rosaleda e que o Zaragoza non puntúe no campo do Betis. A combinación sábea todo o deportivismo a estas alturas de semana. O míster branquiazul, confía na posibilidade de que as matemáticas cadren e as contas saian mañá sen necesidade de esperar a unha xornada final de infarto.
“Podería ser o partido definitivo da salvación, podería darse esa circunstancia. Temos que gañar e imos intentalo”, comentou o preparador deportivista, que desprazará a todos os xogadores a Málaga para facer grupo e por se soa a gaita.
“Por se se dá esa circunstancia imos todos, todo o equipo. Coa confianza de gañar en Málaga e que algún resultado nos favoreza e poder xogar o último partido con tranquilidade”, sinalou Vázquez, que insistiu nas posibilidade factible de que o Deportivo cumpra o obxectivo de quedarse en Primeira sen necesidade de xogarse a vida ante a Real Sociedade o próximo fin de semana no estadio de Riazor.
“É posible. Se lle preguntas ao Zaragoza, dirá que é posible que perdamos en Málaga e eles gañen. Que perda o Zaragoza ante o Betis non é improbable. Que gañemos nós en Málaga parecería pouco probable. Pero calquera resultado agora é posible”, razoou o preparador do conxunto herculino.
O Deportivo saíu dos postos de descenso o pasado fin de semana co triunfo ante o Espanyol e a derrota do Zaragoza na casa ante o Athletic de Bilbao. A meta vese máis preto en A Coruña. ¿Hai ansiedade?
Na casa cústanos máis que fóra, o equipo se está a mostrar máis ansioso. Fóra, o equipo está máis tranquilo, polo menos en canto a posesión e cometer menos erros. Se esa é a liña, creo que estaremos ben en Málaga”, declarou.
O equipo coruñés é o convidado á festa de despedida de Pellegrini, que non volverá sentarse no banco local de La Rosaleda, xa que, a próxima tempada, o técnico chileno dirixirá ao Manchester City.
“A traxectoria de Pellegrini en Primeira está acabada, saldada. É unha arma de dobre fío. É a despedida de Pellegrini e posiblemente a todos lles gustaría despedilo cunha vitoria”, apuntou Fernando Vázquez.
Pero postos a buscar motivacións, o Deportivo ten moitas máis que o cadro andaluz.
“Doado non vai ser, pero non van ter a fame que temos nós. As ganas e a necesidade de buscar posibilidades de gañar son nosas e esa é a nosa forza neste partido. A condición, o instinto, é o que che fai ir, pelexar. A diferenza que pode haber entre o Málaga e nós é que nós podemos buscar enerxía dentro da necesidade e o Málaga, non. Nós temos unha idea á que agarrarnos para crear unha emoción forte. Temos fame, pero tamén temos que poñer máis cousas: intelixencia e estratexia para derrotar ao Málaga, que non vai ser doado” argumentou. O técnico sabe como buscarlle as cóxegas ao Málaga, pero os camiños para encontrarllas son distintos. ¿Á contra ou con posesión? “Pode ser branco ou negro. O Málaga é tecnicamente moi dotado, quizais sería mellor un equipo máis físico para buscar a contra, pero nesta situación, nestes momentos, pola necesidade de gañar é posible que lle saquemos a pelota ao Málaga e eles se senten incómodos así”, razoou.
O Depor tamén está preparado para arriscar en caso de necesidade e para amarrar se sopra vento de cara. “Eu preparo sistemas de risco e de peche. Estamos preparados”, asegurou. n