Galicia rexistrou máis de cen mil doazóns de sangue en 2025
Case a metade dos doantes galegos son da provincia da Coruña
Galicia rexistrou un total de 105.337 de doazóns de sangue ou aférese, o que supón unha cifra moi similar á do ano pasado (105.378), con apenas unha variación de 40. Estas responden os xestos de 73.317 persoas, das cales 9.275 fixérono por primeira vez e o 35 %, máis dunha -na súa maioría, entre dúas e tres veces-.
Estes datos se deprenden do balance anual da Axencia de Doazón de Órganos e Sangue (ADOS), cuxa directora, Marisa López, e o conselleiro de Sanidade, Antonio Gómez Caamaño, presentaron este xoves en rolda de prensa. Este segundo mesmo chanceou con se o dato dos doantes repetidores incluíanlle para facer ver que tamén participou da campaña.
"A actividade de doazón de sangue confirma a xenerosidade e implicación da sociedade galega", manifestou o responsable autonómico, que sacou peito de que a taxa galega estivo nos últimos anos "tres puntos por encima da estatal". Tanto en 2024 e 2025 foi de 39 doazóns por cada 1.000 habitantes.
Esta taxa é desigual entre provincias, coa Coruña (44 / 1.000) á cabeza. Tamén lidera en número absoluto de doazóns, rozando as 50.000, o que supón case a metade do total galego e cunha destacable diferenza respecto de Lugo e a Ourense, onde houbo 8.000 en cada unha.
Precisamente na Coruña atópase o municipio galego coa taxa máis alta: Padrón, que repite neste posto con 92 doazóns por cada 1.000 habitantes. Entre as grandes cidades, Santiago de Compostela é o número 1 no ranking (85 / 1.000), unha cifra onde a participación da comunidade universitaria "ten un peso moi importante", en palabras de López.
A Santiago séguenlle Pontevedra (53 / 1.000) e Ferrol (51 / 1.000). Con todo, se atendemos ás cifras absolutas, o ranking está encabezado polas cidades máis poboadas: Vigo, que rexistrou 12.257 doazóns, e A Coruña, con 9.995.
Perfil do doante
En canto ao perfil do doante, a maioría teñen entre 43 e 52 anos e entre 53 e 70. Os grupos que menos doan seguen sendo os máis novos. A directora de ADOS, consciente desta situación, aduciu que isto se explica por unha pirámide de poboación "envellecida" e manifestou que é necesario "un esforzo" para implicar á xente nova nas campañas.
As doazóns fanse maiormente a través das unidades móbiles, que recolleron o 86,3% das realizadas o pasado ano. A maioría de doantes son do grupo A+ e O+.
"Todo isto axúdanos a cubrir as necesidades de sangue diario dos nosos hospitais, xa que necesitamos entre 400 e 500 doazóns de sangue diarias", apuntou Gómez Caamaño. A directora de ADOS explicou que as doazóns realizadas están "preto da media" e, en consecuencia, responden "de forma adecuada" a estas necesidades.
Iso si, identificou "dous puntos críticos" durante o ano, localizados no verán e o Nadal, para o que procuran manter unha "comunicación fluída" coa cidadanía a través de diferentes canles.
