A Xunta de Galicia vén de adxudicar por máis de 1,3 millóns de euros a obra de ampliación dos talleres de FP do Instituto de Curtis, que realizará a empresa Constructora Consvial. O prazo de execución da actuación, unha vez se inicien os traballos, é de doce meses. O obxectivo desta intervención da Consellería de Educación, Ciencia, Universidades e FP é ampliar os espazos do centro para a Formación Profesional e mellorar a eficiencia enerxética do edificio.
No que atinxe á ampliación, demolerase a nave máis pequena de talleres de mecánica, situada ao fondo da parcela, para construír unha nova máis grande, de case 363 m². Isto permitirá unha distribución máis axeitada e eficiente dos espazos, ademais de gañar altura, explican. A envolvente do volume realizarase en dobre folla de ladrillo cerámico con illamento interior e completarase cun sistema de illamento térmico polo exterior, garantindo a integración co resto das edificacións e mellorando a eficiencia e o confort dos usuarios. As cubertas serán de panel metálico sándwich e policarbonato celular.
A nova nave estará anexa ao muro de contención de terras das pistas deportivas e accederase a ela mediante unha rampla de acceso na parte posterior, para aproveitar o espazo e mellorar así o fluxo circulatorio. Estará dotada de dous aseos e vestiarios adaptados, cabina de lacado, almacén e zona de taller.
A maiores, rehabilitarase o outro taller de mecánica, situado a carón do resto dos edificios do centro. En concreto, colocaranse novas placas de falso teito de paneis sándwich, que melloran a seguridade e o illamento térmico e acústico, e instalaranse novas fiestras de aluminio en substitución dos lucernarios actuais, co que entrará máis luz natural. No exterior renovaranse as carpinterías e colocarase un sistema de illamento térmico.
O programa da obra inclúe tamén melloras de eficiencia enerxética no edificio principal. Nel substituirase a iluminación convencional por 598 unidades LED en prol do aforro enerxético e dun mellor control da súa intensidade en función das necesidades de cada espazo. Tamén se reconfigurarán espazos na terceira planta para crear unha nova aula de plástica.
A maiores, cambiaranse as caldeiras de gasóleo por unhas de biomasa, reducindo a pegada ecolóxica do centro. Instalaranse no almacén existente no extremo esquerdo do edificio, adaptando a súa estrutura, e abastecerán o edificio principal, os talleres e o ximnasio cun sistema de calefacción centralizado e eficiente, explican dende o departamento autonómico.
Esta obra no IES de Curtis súmase á rehabilitación integral acometida neste centro en 2023, na que tamén se investiu preto dun millón de euros.
