A Asociación de Amigos do Camiño de Santiago de Estella presentou hoxe en Compostela o proxecto "Ultreia 3D. Os camiños a Santiago", que achegará o público á ruta francesa, desde Roncesvalles e Somport ata Santiago, a través dun "libro en tres dimensións" elaborado polo especialista audiovisual, Juan Díaz.
A obra terá como espiña dorsal o patrimonio histórico, artístico e paisaxístico, pero mostrándoo dunha forma nova e espectacular, segundo informou nun comunicado a Fundación Catedral de Santiago.
O libro conta coa adaptación a seis idiomas -castelán, francés, inglés, alemán, italiano e coreano- de Julián Díaz, a partir da obra orixinal do especialista no Camiño, Eusebio Goicoechea e ofrécese cunhas lentes para apreciar as 3D.
Nunha segunda fase do mesmo proxecto, os seus promotores pretenden crear unha publicación monográfica sobre o Pórtico da Gloria baixo o nome "Proxecto Rosalía Europa 83", xa que utiliza como guía da obra do Mestre Mateo os versos da autora de Cantares Gallegos e será traducido a 83 linguas.
Esta iniciativa financiarase mediante un mecenado específico para cada un dos idiomas.
A asociación navarra anunciou que o 10% das achegas recibidas polo monográfico sobre o Pórtico destinarase ás obras de restauración da catedral compostelá. EFE.