A conselleira de Política Social e Igualdade, Fabiola García, pediu ao Goberno central que non continúe tratando aos menores migrantes non acompañados como “paquetes” e que, por contra, “dialogue” coas comunidades para acordar a súa acollida no conxunto do territorio.
En declaracións aos medios de comunicación, García lamentou o novo decreto aprobado onte polo Consello de Ministros para a repartición destes menores entre as diferentes comunidades do Estado, solicitando ao Executivo que “respecte” e que “dialogue” coas distintas rexións para “chegar a acordos”.
Volta ao diálogo
“Pedimos que volva ao diálogo e que deixe dunha vez por todas a vía das imposicións. Non se pode continuar tratando aos menores como paquetes, eximirse das súas responsabilidades e tentar traspasar ás comunidades autónomas unha responsabilidade que é nestes momentos do Goberno”, subliñou a titular autonómica de Política Social.
A conselleira reivindicou que Galicia é “solidaria” do mesmo xeito que o resto de España, pero na actualidade existe unha “sobreocupación” dos centros de menores galegos, que están ao 108%, subliñou.
“Co cal nos preguntamos como imos acoller a 317 menores se non temos capacidade residencial. Queremos acoller? Si, pero dentro da nosa capacidade. Non se pode ser solidario co que non se ten”, sentenciou García.
