A valedora do Pobo abre unha queixa de oficio sobre a imposibilidade para acceder a manuais de autoescolas en galego

A valedora do Pobo, Milagros Otero, abriu unha queixa de oficio sobre a imposibilidade para acceder a manuais de autoescolas en lingua galega.

Segundo informa a institución nun comunicado, deste xeito preocúpase por unha das demandas realizadas polos participantes na última convocatoria das marchas 'Correlingua' en favor do galego.

Así, Otero enviou unha carta á Federación Galega de Autoescolas para coñecer se é imposible para os novos condutores acceder a manuais de formación no idioma propio de Galicia. E se é así, coñecer "que medidas ten previsto implantar a federación" para que existan textos en galego nas academias.

Por mor da apertura da investigación de oficio, a valedora tamén dirixe un escrito á Secretaría Xeral de Política Linguística. En concreto, solicítase que informe sobre os datos cos que conta sobre esta "carencia", así como para garantir os dereitos lingüísticos nesta materia.