O Parlamento galego aproba unha iniciativa para esixir ao Goberno central a rebaixa do IVE ao peixe
O Parlamento de Galicia aprobou este martes, por unanimidade, unha proposición non de lei para instar á Xunta de Galicia a que esixa ao Goberno central que tome medidas para impedir que o consumo de peixe “siga en caída histórica”, como a rebaixa do Imposto sobre o Valor Engadido (IVE).
A iniciativa, proposta polo Partido Popular (PP), foi aprobada por unanimidade dos 16 deputados presentes na Comisión oitava de Pesca e Marisqueo que se celebrou na mañá de onte na Cámara autonómica.
O texto da mesma solicitaba “iniciativas de tipo económico como a rebaixa do IVE” ou outras análogas “que permitan incentivar a compra destes produtos”.
Ademais, solicítanse campañas de fomento do consumo entre os mozos, escolares e familias en xeral, para conseguir frear a tendencia de caída do consumo “tan prexudicial para o sector”. Foi o deputado Raúl Santamaría o encargado de defender a proposta, lembrando que un estudo do propio Ministerio de Agricultura, Pesca e Alimentación puxo de manifesto o descenso do consumo de peixe.
“Ante esta situación, o Goberno de España non fixo nada, negándose reiteradamente a rebaixar o IVE do peixe, a pesar da multitude de acordos por unanimidade aprobados neste Parlamento galego”, lamentou o deputado do PP.
Marco financeiro europeo
Entre outros acordos, durante a Comisión tamén se aprobou por unanimidade outra proposición non de lei dos populares sobre a defensa dos intereses do sector pesqueiro na negociación do novo marco financeiro europeo.
O texto insta ao Executivo galego a que demande ao Goberno central que manifeste publicamente o seu rexeitamento “a calquera proposta que implique unha redución substancial dos fondos europeos” destinados ao sector pesqueiro no próximo Marco Financeiro Plurianual (2028-2034).
Tamén solicita que se impulse unha posición común entre os estados membros da Unión Europea con maior peso pesqueiro para rexeitar a redución e propoñer un financiamento “adecuado” e defender un orzamento “específico” e o compromiso co sector, entre outras demandas.
Ademais, tamén se aprobou outra proposición non de lei, neste caso presentada polo BNG, que instaba á Xunta a rexeitar “con firmeza” a proposta da Comisión Europea para o novo marco financeiro plurianual e reclamar que este marco continúe destinando fondos específicos á pesca e que o Goberno central defenda de forma “explícita” ao sector.
