O Goberno galego deu luz verde este luns ao comezo da tramitación da lei galega de acoso e violencia dixital, que se converterá na primeira norma deste tipo en España e que contará con medidas específicas para a protección e atención das vítimas de violencia de xénero.
O presidente da Xunta, Alfonso Rueda, e a conselleira de Igualdade e Política Social, Fabiola García, incidiron na importancia de poñer coto á violencia dixital, que, “por desgraza, cada vez está máis presente e con formas máis complexas”.
O xefe do Executivo galego remarcou que a violencia nas redes xera “importantes riscos”, sobre todo para nenas e mulleres, polo que a Xunta cre que é necesaria “unha normativa específica”.
Entre as medidas prevese un mecanismo para borrar a pegada dixital –previa sentenza xudicial–, co que se trata de facilitar a eliminación do material dixital accesible en rede usado como instrumento de acoso ou violencia dixital, favorecendo a restauración da reputación dixital.
Tamén contempla a creación dun espazo virtual de asesoramento para as vítimas ou programas psicopedagóxicos para a atención a adiccións a novas tecnoloxías.
De igual forma, implementaranse máis medidas de prevención e sensibilización no ámbito educativo, tanto na etapa de Secundaria como no ensino universitario.
Para iso, aínda que a lei galega para a prevención e o tratamento integral da violencia de xénero de 2007 xa recolle como violencia de xénero “a violencia dixital ou en liña contra as mulleres”, o novo anteproxecto de lei abordado onte polo Executivo autonómico busca definir os conceptos de acoso e violencia dixital para así actuar dunha forma máis adecuada.
Así mesmo, fixaranse os principios de actuación, establecer medidas de prevención, sensibilización, prevención e detección, posibilitarlle a formación na materia ao persoal da Xunta e das forzas de seguridade, e articular medidas de protección e apoio ás vítimas.
Tras o seu paso polo Consello, o anteproxecto de lei sométese desde hoxe e durante 15 días á consulta pública previa, co obxecto de recoller as achegas da cidadanía e das organizacións e asociacións máis representativas potencialmente afectadas pola futura norma.
