A Xunta advirte dun fenómeno meteorolóxico adverso de nivel laranxa

A Xunta alertou do inicio ás 18.00 horas de hoxe dun fenómeno meteorolóxico adverso que afectará as costas da Coruña e Lugo, con nivel de alerta laranxa.

Trátase de mar de fondo do noroeste, con ondas que superarán os 4 metros de altura, segundo a Axencia Estatal de Meteoroloxía (AEMET).

Por iso, a dirección xeral de Emerxencias e Interior informou da situación aos municipios das dúas provincias, deputacións, servizos provinciais e asociacións de Protección Civil, así como os clubs náuticos de ambas as demarcacións.

Tamén lembra á poboación a importancia de seguir medidas de protección individual, como non achegarse a diques ou rompentes ou vixiar a posibilidade de desprendementos de obxectos desde os balcóns e as xanelas.