Manuel Martínez | “O belén de Bribes é algo singular, unha cousa digna de ver”

Este domingo, día 14, Bribes volverá converterse no escenario do nacemento de Xesús grazas ao belén vivinte que cada decembro sorprende a veciños e visitantes e que desde hai tres anos ten unha “cor” especial co apoio da Fundación Venancio Salcines. 

Desde as 11.00 ata as 18.00 horas, decenas de figurantes poblarán a Horta do Mosteiro para recrear diferentes estampas tradicionais do Nadal, unha actividade que organiza a asociación veciñal O Cruceiro, presidida por Manuel Martínez. 

Este belén medra cada ano.

A verdade é que bastante, este ano somos máis que no 2024. Sumouse nova xente, rondaremos as 70 personas figurantes. E o decorado sempre cambia algo, tratamos de retocar algún dos puntos. 

Canto tempo lles leva preparar toda a posta en escena? 

Comezamos case un mes antes unhas dez, doce persoas, según o día, a montar todo. Son moitas horas de traballo. 

O evento gañou impulso co apoio da Fundación Venancio Salcines nos últimos anos. 

Desde logo. Non só axuda económicamente, senón tamén no ámbito da promoción desta actividade. Realiza toda a publicidade, organiza un concerto na igrexa e financia todos eses gastos. Temos que agradecerlle moitísimo o seu apoio, este é o tercer ano que colabora, que o belén estivo a punto de non poder celebrarse por falta de fondos. 

Canta xente pasa por Bribes en cada edición do belén vivinte? 

O ano pasado contaron que viñeran 10.000 persoas, eu non as contei (risas). Vén moitísima xente da zona pero sempre hai caras novas e incluso moitos nenos queren anotarse para ser figurantes o seguinte ano. Este ano temos máis nenos que nunca, antes eran uns 20 e xa case chegamos a 40. 

Que papeis fan os nenos? 

Pastores, ferreiros, canteiros, paxes dos Reis... todos os oficios. Aquí temos de todo, hai que achegarse porque é unha cousa singular, digna de ver. 

Dende cando hai esta tradición? 

Máis ou menos desde 2002. Nos inicios poñíase aquí un belén pero non era vivinte; empezou a anterior presidenta, que hoxe se encarga do grupo dos nenos que participan no belén. Eu tardei en entrar na directiva, cheguei en 2010 e son presidente desde 2011. A ver se o próximo ano é o último, que a saúde non me acompaña moito e esta asociación necesita xente nova que lle dea vida, hai que facer aínda moitas cousas.