Este venres 16 de maio, ás 19.30 h, teremos connosco a Xosé Luís Rivas “Mini” para ofrecernos unha charla cantada, para deste xeito celebrar o Día das Letras Galegas.

Esta charla cantada versará sobre a música tradicional coma conservadora e xeradora da nosa identidade. Música e canción que residiron no pobo chao e que serviron para resistir os embates da aculturación e dar vida á vida colectiva e aos soños.

Xosé Luís Rivas Cruz, coñecido como Mini, é un músico, político e mestre. Destacou como integrante do dúo Mini e Mero, un referente da música tradicional galega dende os anos 70, vencellado ao grupo Fuxan os Ventos e ao colectivo Nova Canción Galega, comprometido coa recuperación e difusión do patrimonio musical galego.

Ademais da súa traxectoria musical, Mini tamén desenvolveu unha carreira como docente e foi deputado no Parlamento Galego polo BNG entre 2016 e 2023.