Tanxugueiras, 9Louro ou Dakidarría para celebrar as Letras Galegas na Coruña
A cidade contará con catro días de propostas culturais, do 14 ao 17 de maio
A Coruña volverá conmemorar as Letras Galegas, este ano adicadas a Begoña Caamaño, cunha nova edición da Festa das Letras, que durante catro días encherá a cidade de propostas culturais como concertos ou un encontro con Tanxugueiras no teatro Colón.
A programación comezará, precisamente, o 14 de maio ás 19.30 horas no Colón co encontro con Aida Tarrío e Olaia e Sabela Maneiro, arredor do seu novo disco, 'O Cuarto'.
O venres día 15 a actividade se multiplicará pola cidade. Na praza de España, desde as 20.00 horas, haberá concertos de Néboa, Ailá e Brais Morán & Nasafunk. Na praza de Azcárraga, desde as 18.00, as propostas serán para o público infantil con Charlatán Rodríguez e Uxía Lambona e a Banda Molona. A música tradicional tomará Méndez Núñez con Xacarandaina e Son d'Aquí. O Ágora, pola súa banda, vivirá un concerto de Ialma, enmarcado tamén no ciclo cultural 'AgoraSón'.
O día previo ás Letras Galegas, o sábado 16, a música apenas deixará de sonar durante o día. Na praza de España comezará a sonar ás 12.00horas con Kafédepota e finalizará ben entrada a madrugada con Dakidarría, con actuacións entremedias de MJ Pérez, Adhara & Ritman, a Orquestra Bravú Xangai e 9Louro. A música tradicional voltará a Méndez Núñez a partir das 18.30 horas con Cántigas da Terra e Donaire. E o público infantil terá catro propostas en Azcárraga: K'paparota (12.00 horas), Pakolas (13.00), Cris de Caldas (18.00) e Pesdelán (19.00).
O propio día 17 serán dúas as propostas culturais desta Festa das Letras. Ás 12.15 horas actuarán no teatro Colón a Banda Municipal de Música da Coruña xunto á Escola de Artes Escénicas da Estrada. Ás 18.30 horas, en Méndez Núñez, celebrarase a Foliada das Letras, con Cántigas da Terra, Donaire, Maghúa, Son d'Aquí, Xacarandaina e Espadana. O derradeiro acto será no teatro Colón, ás 20.30, cando Isabel Dobarro presente o seu novo traballo, 'Eidos'.
A alcaldesa, Inés Rey, aseguraba na presentación destas actividades que con elas "A Coruña se prepara para celebrar unha das datas máis importantes do noso calendario cultural". Destacou tamén a figura de Begoña Caamaño, "unha figura esencial da nosa literatura". Con todo, A Coruña será testemuña "dunha celebración colectiva da palabra e tamén da creatividade e da memoria dun pobo que se expresa en galego", sinalou este xoves a rexedora, que subliñou tamén a diversidade de propostas e que esta programación é "diversa e gratuita".
