O presidente da Mesa pola Normalización Lingüística, Carlos Callón, reivindicou onte o uso do galego en todos os ámbitos públicos e privados de Galicia e pediu que este idioma non se converta nunha “reliquia inútil para admirar”.Nunha declaración institucional, Callón afirmou que os galegos “deben sentirse orgullosos de ter unha lingua propia” e da “proeza” de que esta “se siga mantendo despois de séculos de marxinación”.
O presidente da Mesa criticou que “aínda no ano 2008 non existe igualdade de oportunidades segundo se fale castelán ou galego” e pediu a mobilización cidadá para acabar coa “discriminación lingüística”.
Neste sentido, Carlos Callón recordou as denuncias levadas a cabo pola Mesa este mesmo ano no caso dun traballadora dun supermercado que foi reprendida por falar en galego e dun vigués que non foi contratado nun hotel da cidade olívica, a pesar de ter a formación necesaria, polo risco de que “se lle escapase algo en galego”.
Así, Callón sinalou que “sen reivindicacións non hai conquistas” e pediu á poboación que reclame o seu “dereito a vivir en galego” participando na manifestación convocada pola Mesa para hoxe na Alameda compostelana.
“Se a sociedade galega non se mobiliza, ninguén se vai mobilizar pola lingua galega”, alertou Carlos Callón, “por iso é necesario que na manifestación participe toda a sociedade comprometida co noso idioma”.
Manifestación > No relativo á manifestación de hoxe, o presidente da Mesa asegurou que o evento conta xa co apoio de 477 entidades de diferente natureza, como asociacións de veciños, agrupacións culturais e concellos; o que, na súa opinión, “demostra a implicación e o desexo da sociedade galega de vivir en galego”.
Callón adiantou así mesmo que o manifesto final da manifestación, que se lerá na Praza da Quintana, correrá a cargo de catro persoas “que representan a loita polo dereito a falar en galego”.
En concreto participarán no acto a xuíza Ana López Suevos, “denunciada por escribir unha sentenza en galego”; o produtor Ignacio Vilar, cuxo filme “Pradolongo” “non se puido visionar en ningunha sala comercial de Santiago por estar en galego”; Xesús da Torre, o vigués que non foi contratado nun hotel da cidade olívica por ser galegoparlante; e Eduardo Álvarez, un profesor “denunciado e sancionado por solicitar o dereito a expresarse en galego”.
Dende A Mesa recordaron que durante a tarde de onte levarán a cabo unha campaña informativa para animar á poboación a que participe na manifestación de mañá a partir das 12.00 horas, terá lugar na Praza do Toural .
