Unha trintena de incidencias na primeira xornada de tempo outonal en Galicia

A primeira xornada de tempo outonal causou unha trintena de incidencias en diferentes puntos de Galicia entre as 20,00 horas do sábado e as 8,00 horas deste domingo.

En concreto, segundo informou o 112 Galicia, a chuvia rexistrada nas últimas horas provocou o anegamento de rúas en municipios como Vilagarcía (Pontevedra), Narón (A Coruña) ou Santiago. En total, no Centro de Atención ás Emerxencias contabilizáronse ata once incidentes deste tipo en toda a comunidade.

A auga caída durante a noite tamén causou algún que outro problema na rede viaria, especialmente pola presenza de bolsas de auga nas estradas. Neste caso, contabilizáronse ata seis incidencias, en localidades coruñesas como Ferrol, Fene ou Padrón.

Por último, outra media ducia de persoas chamaron durante a noite o 112 Galicia para alertar de anegamentos nas súas vivendas, locais comerciais ou garaxes.

Ademais, segundo informaron os Bombeiros de Cee sobre as 6,50 horas deste domingo acudiron a retirar unha árbore que cortaba un dos carrís de circulación da estrada que une Cee con Lires, no quilómetro 0,300 na parroquia de Toba.