Un incendio provocou o desaloxo dun edificio situado na rúa Cristóbal Colón de Ribeira (A Coruña), este sábado ás 22,30, segundo informou o 112 Galicia.
As lapas comezaron nunha papeleira dun cuarto que servía de despacho e estendéronse dende o chan ata os mobles do domicilio.
Despois de que un particular advertise dos feitos ao 112, as forzas da orde procederon a desaloxar o inmoble con motivo da presenza de menores entre os inquilinos.
Mentres tanto, os bombeiros de Ribeira e de Boiro encargáronse de extinguir o lume. Tamén interviñeron a Policía Nacional e Local e o Grupo de Emerxencias de Ribeira.