Triunfo inapelable de Javier Gómez Noya no Test Olímpico, que se celebrou en Río de Janiero. Foi unha vitoria excepcional, fronte aos mellores triatletas do mundo e na que o galego estivo sempre ben colocado e atacou na carreira a pe para chegar en solitario á liña de meta.
Tamén hai que destacar a undécima posición de outro galego, Fernando Alarza, que veu remontando dende o segundo grupo e logrou un magnífico undécimo posto.
Gómez Noya amosou a súa veteranía en todo momento. Sempre estivo onde quería, controlando a carreira dende as primeiras posicións. Sabe Javi o importante que é non quedar descolgado na bicicleta, porque despois recuperar o tempo perdido é moi complexo.
Así, saíu entre os primeiros das quentes augas da praia de Copacabana, tras percorrer 1.500 metros, e logrou crear un grupo de cabeza formado por 11 deportistas que foi abrindo oco a medida que caían os quilómetros. Como compañeiros de escapada deportistas de renome coma o vixente campeón olímpico, Alistair Brownlee, Richard Varga, Vincent Luis, Royle ou Schoeman. Por detrás, no segundo grupo, Alarza e outros dous españois participantes, Mario Mola e Cesc Godoy.
O grupo cabeceiro, que foi perdendo compoñentes, traballaba moi forte, sabedor de que si chegaban á última transición cunha distancia importante o vencedor sería para un dos seus integrantes. O primeiro grupo arribou á T2 con 1 minuto e 40 segundos sobre o segundo.
A proba tiña un certo parecido co que sucedeu a última cita das Series Mundiais, en Hamburgo. E cando comezou a carreira a pe, a semellanza comezaba a ser preocupante: Gómez Noya e Vincent Luis decidiron marcar un ritmo moi alto que ningún outro deportista puido aguantar.
Así, na primeira volta ambos deportistas ían xuntos, pero o ferrolán decidiu non esperar ao sprint final, no que en principio é mellor o francés. Na segunda volta Javi atacou e deixou atrás a Luis, que non puido engancharse ás costas do ferrolán.
Aínda quedaban moitos quilómetros por diante, pero Gómez Noya seguiu con ritmo moi alto e constante que lle permitiu chegar a meta en solitario. A segunda posición foi para Vincent Luis e a terceira para Richard Murray, mentres que Mario Mola rematou sétimo.